ບຸກຄົນໃດໜຶ່ງ ທີ່ມີຈຸດປະສົງຂໍການຊ່ວຍເຫຼືອທາງດ້ານກົດໝາຍ ສາມາດຮ້ອງຂໍການຊ່ວຍເຫຼືອທາງດ້ານກົດໝາຍດ້ວຍຕົນເອງ ເປັນລາຍລັກອັກສອນ ຫຼື ທາງປາກເປົ່າຕໍ່ການຈັດຕັ້ງໃຫ້ການຊ່ວຍເຫຼືອທາງດ້ານກົດໝາຍ ບ່ອນຜູ້ຮ້ອງຂໍອາໄສຢູ່ ຫຼື ບ່ອນທີ່ມີເງື່ອນໄຂສະດວກ.

ໃນກໍລະນີ ຜູ້ຮ້ອງຂໍການຊ່ວຍເຫຼືອທາງດ້ານກົດໝາຍ ບໍ່ສາມາດຮ້ອງຂໍດ້ວຍຕົນເອງໄດ້ນັ້ນ ໃຫ້ຜູ້ຕາງໜ້າຄອບຄົວ ຫຼື ຍາດພີ່ນ້ອງ ຮ້ອງຂໍ ແທນຕົນກໍໄດ້.

ອົງການປົກຄອງບ້ານ, ໂຮງຮຽນ, ໂຮງໝໍ ຫຼື ການຈັດຕັ້ງອື່ນ ທີ່ພົບເຫັນບຸກຄົນທີ່ຕ້ອງການຂໍການຊ່ວຍເຫຼືອທາງດ້ານກົດໝາຍ ກໍສາມາດ ສະເໜີຕໍ່ການຈັດຕັ້ງໃຫ້ການຊ່ວຍເຫຼືອທາງດ້ານກົດໝາຍ ບ່ອນທີ່ມີເງື່ອນໄຂສະດວກ ແທນຜູ້ກ່ຽວກໍໄດ້.

ຜູ້ມີຈຸດປະສົງຂໍການຊ່ວຍເຫຼືອທາງດ້ານກົດໝາຍ ທີ່ບໍ່ມີຄວາມສາມາດຂຽນ ຫຼື ບໍ່ສາມາດເຂົ້າໄປຂໍການຊ່ວຍເຫຼືອທາງດ້ານກົດໝາຍໂດຍກົງໄດ້ ຜູ້ກ່ຽວກໍສາມາດໂທລະສັບ, ສົ່ງຂໍ້ຄວາມຜ່ານໂທລະສັບ ຫຼື ເຄື່ອງມືສື່ສານຕ່າງໆຫາການຈັດຕັ້ງຊ່ວຍເຫຼືອທາງດ້ານກົດໝາຍໄດ້.

ໃນກໍລະນີ ຜູ້ຮ້ອງຂໍການຊ່ວຍເຫຼືອທາງດ້ານກົດໝາຍ ບໍ່ສາມາດໂທລະສັບ, ສົ່ງຂໍ້ຄວາມຜ່ານໂທລະສັບ ຫຼື ນໍາໃຊ້ເຄື່ອງມືສື່ສານຕ່າງໆ ດ້ວຍຕົນເອງໄດ້ ໃຫ້ ຄອບຄົວ, ຍາດພີ່ນ້ອງ ຫຼື ອົງການຈັດຕັ້ງທີ່ກ່ຽວຂ້ອງເຊັ່ນ: ອົງການປົກຄອງບ້ານ, ໂຮງຮຽນ, ໂຮງໝໍ ແລະ ອົງການຈັດຕັ້ງອື່ນ ໂທລະສັບ, ສົ່ງຂໍ້ຄວາມຜ່ານໂທລະສັບ ຫຼື ເຄື່ອງມືສື່ສານແທນຜູ້ກ່ຽວໄດ້.

ການຂໍການຊ່ວຍເຫຼືອທາງດ້ານກົດໝາຍ ນອກຈາກການປະຕິບັດຕາມວິທີການທີ່ກ່າວຂ້າງເທິງນັ້ນແລ້ວ ຍັງສາມາດປະຕິບັດດ້ວຍວິທີການອື່ນ.

ອົງການຈັດຕັ້ງໃຫ້ການຊ່ວຍເຫຼືອທາງດ້ານກົດໝາຍ ຕ້ອງຮັບເອົາຄໍາຮ້ອງ ຫຼື ຄໍາສະເໜີ ຂໍການຊ່ວຍເຫຼືອທາງດ້ານກົດໝາຍ ດ້ວຍການຈົດເຂົ້າປຶ້ມບັນທຶກ, ໃສ່ເລກທີ, ລົງວັນທີ ພ້ອມທັງເຮັດໃບຕິດຕາມເອກະສານ ໃຫ້ແກ່ຜູ້ມາຢື່ນເພື່ອເປັນຫຼັກຖານ.

ການຮ້ອງຂໍ ຫຼື ສະເໜີທາງປາກເປົ່າ, ໂດຍກົງ ລວມທັງການຂໍທາງໂທລະສັບ ຫຼື ເຄື່ອງມືສື່ສານທີ່ບໍ່ເປັນລາຍລັກອັກສອນ ກໍໃຫ້ຈົດເຂົ້າປຶ້ມບັນທຶກ ແລະ ປະຕິບັດເຊັ່ນດຽວກັນກັບຂ້າງເທີງ ພ້ອມທັງໃສ່ເລກທີ, ລົງວັນທີ ໃຫ້ຜູ້ຕິດຕໍ່ພົວພັນຊາບ.

ການຈັດຕັ້ງໃຫ້ການຊ່ວຍເຫຼືອທາງດ້ານກົດໝາຍ ຕ້ອງໄດ້ຄົ້ນຄ້ວາ ແລະ ຕົກລົງ ກ່ຽວກັບການໃຫ້ການຊ່ວຍເຫຼືອທາງດ້ານກົດໝາຍ ພາຍໃນ ຫ້າວັນ ລັດຖະການ ນັບແຕ່ວັນໄດ້ຮັບການຮ້ອງຂໍ ເປັນຕົ້ນໄປ.

ໃນກໍລະນີຮີບດ່ວນ ການຂໍການຊ່ວຍເຫຼືອທາງດ້ານກົດໝາຍ ຕ້ອງຮີບຮ້ອນຄົ້ນຄ້ວາ ແລະ ຕົກລົງໃຫ້ການຊ່ວຍເຫຼືອໂດຍດ່ວນ.

ສະພາທະນາຍຄວາມ ຫຼື ການຈັດຕັ້ງທີ່ກ່ຽວຂ້ອງ ຕ້ອງແຕ່ງຕັ້ງທະນາຍຄວາມ ຫຼື ລັດຖະກອນ ໃຫ້ເປັນຜູ້ຕາງໜ້າ ເພື່ອໃຫ້ການຊ່ວຍເຫຼືອທາງດ້ານກົດໝາຍ ພາຍໃນ ສາມວັນ ລັດຖະການ ນັບແຕ່ວັນໄດ້ຮັບການຮ້ອງຂໍ ຂອງບຸກຄົນ ຫຼື ການສະເໜີຂອງຂະແໜງການຍຸຕິທໍາ, ສະຫະພັນແມ່ຍິງ ແລະ ອົງການຈັດຕັ້ງອື່ນທີ່ກ່ຽວຂ້ອງ.

ການຈັດຕັ້ງໃຫ້ການຊ່ວຍເຫຼືອທາງດ້ານກົດໝາຍ ຫຼື ສະພາທະນາຍຄວາມ ສະເໜີກອງທຶນຊ່ວຍເຫຼືອທາງດ້ານກົດໝາຍ ເພື່ອພິຈາລະນາອະນຸມັດ ການນໍາໃຊ້ງົບປະມານຂອງກອງທຶນຊ່ວຍເຫຼືອທາງດ້ານກົດໝາຍ ເຂົ້າໃນການເຄື່ອນໄຫວຊ່ວຍເຫຼືອທາງດ້ານກົດໝາຍ, ຄ່າໃຊ້ຈ່າຍໃຫ້ທະນາຍຄວາມ ຫຼື ລັດຖະກອນ ທີ່ຖືກແຕ່ງຕັ້ງ.

ກອງເລຂາກອງທຶນຊ່ວຍເຫຼືອທາງດ້ານກົດໝາຍ ຕ້ອງໄດ້ພິຈາລະນາ ແລະ ສະເໜີຂໍອະນຸມັດງົບປະມານຊ່ວຍເຫຼືອ ຈາກສະພາບໍລິຫານກອງທຶນ ພາຍໃນ ສາມວັນ ລັດຖະການ ນັບແຕ່ວັນໄດ້ຮັບການສະເໜີຈາກອົງການຈັດຕັ້ງໃຫ້ການຊ່ວຍເຫຼືອທາງດ້ານກົດໝາຍ ຫຼື ສະພາທະນາຍຄວາມ ເປັນຕົ້ນໄປ.