ການສະໜອງຂໍ້ມູນຂ່າວສານທາງດ້ານການກົດໝາຍ

ການສະໜອງຂໍ້ມູນຂ່າວສານ ແມ່ນການໃຫ້ຂໍ້ມູນຂ່າວສານທາງດ້ານກົດໝາຍ ດ້ວຍການໃຫ້ອ່ານ, ຈົດບັນທຶກເອົາ ຫຼື ສໍາເນົາເອົານິຕິກໍາ ທີ່ກ່ຽວຂ້ອງກັບການຮ້ອງຂໍ ຫຼື ການສະເໜີ ຊຶ່ງສາມາດປະຕິບັດໄດ້ຫຼາຍວິທີ ເຊັ່ນ: ຢູ່ກັບທີ່, ເຄື່ອນທີ່, ຜ່ານເຄື່ອງມືສື່ສານ ຫຼື ອຸປະກອນເອເລັກໂຕຣນິກ, ໂຄສະນາເຜີຍແຜ່ກົດໝາຍ ແລະ ຜ່ານສື່ສິ່ງພິມຕ່າງໆ ດັ່ງນີ້:

• ການສະໜອງຂໍ້ມູນຂ່າວສານກັບທີ່ ໃຫ້ປະຕິບັດຢູ່ໃນຫ້ອງການຂອງການຈັດຕັ້ງໃຫ້ການຊ່ວຍເຫຼືອທາງດ້ານກົດໝາຍ.
• ການສະໜອງຂໍ້ມຸນຂ່າວສານເຄື່ອນທີ່ ແມ່ນການລົງໄປເຄື່ອນໄຫວສະໜອງຂໍ້ມູນຂ່າວສານທາງດ້ານກົດໝາຍແກ່ປະຊາຊົນຢູ່ທ້ອງຖິ່ນ ຫຼື ຮາກຖານບ້ານ ໂດຍໃຫ້ປະຕິບັດໄປພ້ອມດຽວກັນກັບການລົງເຄື່ອນໄຫວໂຄສະນາເຜີຍແຜ່ກົດໝາຍ ແລະ ການໃຫ້ຄໍາປຶກສາທາງດ້ານກົດໝາຍແບບເຄື່ອນທີ່.
• ການສະໜອງຂໍ້ມູນຂ່າວສານຜ່ານເຄື່ອງມືສື່ສານ ແລະ ອຸປະກອນເອເລັກໂຕຣນິກ ແມ່ນການໃຫ້ຂໍ້ມູນຂ່າວສານທາງດ້ານກົດໝາຍ ໂດຍຜ່ານໂທລະສັບ, ວິທະຍຸກະຈາຍສຽງ, ໂທລະພາບ, ໂທລະໂຄ່ງ ແລະ ອິນເຕີເນັດ ໃຫ້ແກ່ຜູ້ຮ້ອງຂໍ ຫຼື ຜູ້ສະເໜີ.
• ການສະໜອງຂໍ້ມູນຂ່າວສານຜ່ານສື່ສິ່ງພິມ ແມ່ນການສະໜອງຜ່ານໜັງສືພິມ, ວາລະສານ, ໃບຂ່າວສານ, ຈົດໝາຍເຫດທາງລັດຖະການ, ແຜ່ນເຈ້ຍທີ່ມີຕົວໜັງສື ຫຼື ຮູບພາບໃຫ້ແກ່ຜູ້ຮ້ອງຂໍ ຫຼື ຜູ້ສະເໜີ.

ການໃຫ້ຄໍາປຶກສາທາງດ້ານກົດໝາຍ

ການໃຫ້ຄໍາປຶກສາທາງດ້ານກົດໝາຍ ແມ່ນການແນະນໍາ, ອະທິບາຍທາງປາກເປົ່າ ຫຼື ເປັນລາຍລັກອັກສອນກ່ຽວກັບກົດໝາຍທີ່ກ່ຽວຂ້ອງກັບການຮ້ອງຂໍ ຫຼື ການສະເໜີ ຊຶ່ງສາມາດປະຕິບັດໄດ້ຫຼາຍວິທີ ເຊັ່ນ: ໃຫ້ຄໍາປຶກສາຢູ່ກັບທີ່, ເຄື່ອນທີ່ຜ່ານເຄື່ອງມືສື່ສານ ຫຼື ອຸປະກອນເອເລັກໂຕຣນິກ ດັ່ງນີ້:

• ການໃຫ້ຄໍາປຶກສາກັບທີ່ ແມ່ນການແນະນໍາ, ອະທິບາຍທາງປາກເປົ່າ ຫຼື ເປັນລາຍລັກອັກສອນກ່ຽວກັບກົດໝາຍ ໂດຍໃຫ້ປະຕິບັດຢູ່ໃນຫ້ອງການຂອງການຈັດຕັ້ງໃຫ້ການຊ່ວຍເຫຼືອທາງດ້ານກົດໝາຍ.
• ການໃຫ້ຄໍາປຶກສາເຄື່ອນທີ່ ແມ່ນການແນະນໍາ, ອະທິບາຍທາງປາກເປົ່າ ຫຼື ເປັນລາຍລັກອັກສອນກ່ຽວກັບກົດໝາຍ ໂດຍໃຫ້ປະຕິບັດໄປພ້ອມກັບການສະໜອງຂໍ້ມູນຂ່າວສານໃນເວລາລົງໄປເຄື່ອນໄຫວວຽກງານໃຫ້ຄໍາປຶກສາ ແລະ ໂຄສະນາເຜີຍແຜ່ກົດໝາຍ ໂດຍໃຫ້ປະຕິບັດຢູ່ນອກຫ້ອງການຂອງການຈັດຕັ້ງໃຫ້ການຊ່ວຍເຫຼືອທາງດ້ານກົດໝາຍ.
• ການໃຫ້ຄໍາປຶກສາຜ່ານເຄື່ອງມືສື່ສານ ຫຼື ອຸປະກອນເອເລັກໂຕຣນິກ ແມ່ນການແນະນໍາ, ອະທິບາຍກົດໝາຍຜ່ານໂທລະສັບ, ອິນເຕີເນັດ ທີ່ທາງການອະນຸຍາດ.

ການຊ່ວຍເຫຼືອໃນການຮ່າງເອກະສານ

ການຊ່ວຍເຫຼືອໃນການຮ່າງເອກະສານ ແມ່ນການຊ່ວຍເຫຼືອຜູ້ຮ້ອງຂໍໃນການແຕ່ງ ແລະ ການປະກອບເອກະສານຕ່າງໆເຊັ່ນ: ຄໍາຮ້ອງຟ້ອງ, ຄໍາແກ້ຟ້ອງ, ສັນຍາ, ພິໄນກໍາ ແລະ ເອກະສານອື່ນໆ ທີ່ກ່ຽວຂ້ອງກັບການຮ້ອງຂໍ ຫຼື ສະເໜີ.

ການຊ່ວຍເຫຼືອໃນການຮ່າງເອກະສານ ໃຫ້ດໍາເນີນຢູ່ກັບທີ່. ໃນກໍລະນີທີ່ຜູ້ໄດ້ຮັບການຊ່ວຍເຫຼືອບໍ່ສາມາດເຂົ້າມາໃຊ້ບໍລິການກັບທີ່ໄດ້ ຍ້ອນເຈັບເປັນ ຫຼື ດ້ວຍເຫດປົນອື່ນທີ່ເຊື່ອຖືໄດ້ ບຸກຄົນໃຫ້ການຊ່ວຍເຫຼືອທາງດ້ານກົດໝາຍຕ້ອງລົງໄປໃຫ້ບໍລິການຢູ່ບ່ອນທີ່ຜູ້ກ່ຽວອາໄສຢູ່ ຫຼື ສະຖານທີ່ອື່ນ ທີ່ເໝາະສົມ.

ການເປັນຜູ້ຕາງໜ້າໃນການດໍາເນີນຄະດີ

ການເປັນຜູ້ຕາງໜ້າໃນການດໍາເນີນຄະດີ ແມ່ນການເຂົ້າຮ່ວມໃນການດໍາເນີນຄະດີ ຕາມຂະບວນການຍຸຕິທໍາ ໃນນາມຜູ້ໄດ້ຮັບການຊ່ວຍເຫຼືອທາງດ້ານກົດໝາຍ ໂດຍແມ່ນທະນາຍຄວາມທີ່ໄດ້ຮັບການແຕ່ງຕັ້ງ ຈາກສະພາທະນາຍຄວາມເຊັ່ນ: ເຂົ້າຮ່ວມໃນຂັ້ນຕອນ ການສຶບສວນ-ສອບສວນ, ການວ່າຄວາມໃນທີ່ປະຊູມສານ, ຕິດຕາມການຈັດຕັ້ງປະຕິບັດ ຄໍາຕັດສິນຂອງສານ.