ໃນວັນທີ 18 ມີນາ 2026 ທີ່ນະຄອນຫຼວງວຽງຈັນ ໄດ້ມີກອງປະຊຸມຄະນະຊີ້ນໍາຄັ້ງທີ 4 ແຜນງານລາວ/037-ເສີມສ້າງລັດແຫ່ງກົດໝາຍ, ການເຂົ້າເຖິງຄວາມຍຸຕິທໍາ ແລະ ການປົກຄອງທີ່ດີ (ROLAG) ຂຶ້ນ, ໂດຍການເປັນປະ ທານຮ່ວມຂອງທ່ານ ຮສ ປອ ອຸ່ນຫຼ້າ ສີວັນເພັງ ຮອງຜູ້ອໍານວຍການໃຫຍ່ ມະຫາວິທະຍາໄລແຫ່ງຊາດ ແລະ ທ່ານ ໂທມັສ ລາມມາ, ອຸປະທູດລຸກຊໍາບວກປະຈໍາ ສປປ ລາວ; ໃຫ້ກຽດເຂົ້າຮ່ວມກອງປະຊຸມຄັ້ງນີ້ໂດຍມີ ທ່ານ ເກດສະໜາ ພົມມະຈັນ ອາດີດຮອງລັດຖະມົນຕີ ກະຊວງຍຸຕິທໍາ, ມີຜູ້ຕາງໜ້າຈາກກະຊວງຍຸຕິທໍາ, ສະຖາບັນການສຶກສາ, ບັນດາແຂວງເປົ້າໝາຍຂອງແຜນງານ ເຂົ້າຮ່ວມ.

ໃນປີຜ່ານມາ ແຜນງານການເສີມສ້າງລັດທີ່ປົກຄອງດ້ວຍກົດໝາຍ ການເຂົ້າເຖິງຄວາມຍຸຕິທໍາ ແລະ ການປົກ ຄອງທີດີ ໄດ້ບັນລຸໝາກຜົນທີສໍາຄັນໃນຫຼາຍດ້ານ ຄື: ການເສີມສ້າງສະຖາບັນ ໄດ້ມີການຝຶກອົບຮົມ ແລະ ສະໜັບສະໜູນດ້ານນະໂຍບາຍໃຫ້ແກ່ສະຖາບັນຍຸຕິທໍາຕ່າງໆ ເພື່ອເພີມທັກສະດ້ານຈັນດາບັນ ແລະ ການສືບສວນທາງດ້ານເງິນ ການເຂົ້າເຖິງຄວາມຍຸຕິທໍາ ໄດ້ປັບປຸງຫ້ອງການຊ່ວຍເຫຼືອທາງດ້ານກົດໝາຍ ຈໍານວນ 19 ຫ້ອງ ແລະ ຈັດຕັ້ງການລົງຕັ້ງໂຕະໃຫ້ຄໍາປຶກສາທາງດ້ານກົດໝາຍໃນແບບເຄືອນທີ່ ເຊິງສາມາດເຂົ້າເຖິງ ແລະ ຊ່ວຍເຫຼືອປະຊາຊົນໄດ້ຫຼາຍກວ່າ 11.000 ຄົນ (ສິບເອັດພັນຄົນ), ໃນການໄກ່ເກຍຂັ້ນຮາກຖານ ກໍໄດ້ເພີມຄວາມສາມາດໃຫ້ແກ່ໜ່ວຍງານໄກ່ເກຍບ້ານ ໃຫ້ມີຄວາມເຂັ້ມແຂງ ເພືອເຊືອມໂຍງເຂົ້າສູ່ຂະແໜງຍຸຕິທໍາຢ່າງເປັນທາງການ, ດ້ານການສຶກສາ ໄດ້ປັບປຸງການສຶກສາທາງດ້ານກົດໝາຍຢູ່ມະຫາວິທະຍາໄລແຫ່ງຊາດລາວ ໃຫ້ມີຄວາມທັນສະໄໝ ແລະ ສອດຄ່ອງກັບມາດຕະຖານສາກົນ.

ກອງປະຊຸມໄດ້ເຫັນດີຮັບຮອງເອົາແຜນການປະຕິບັດປີ 2026 ໃໝ່, ໂດຍມີຈຸດເນັ້ນໜັກ ຄື: ການຕ້ານການຟອກເງິນ, ຮັບຮອງການເພີມງົບປະມານ ເພືອສະໜັບສະໜູນວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍການຮ້າຍ; ໃນການປົກຄອງທີດີໄດ້ສືບຕໍ່ສົ່ງເສີມຄວາມໂປງໃສ ແລະ ປະສິດຕິພາບໃນການບໍລິຫານລັດ ທ່ານ ໂທມັສ ລາມມາ ໄດ້ຢືນຢັນຄໍາໝັ້ນສັນຍາ ຂອງລຸກຊໍາບວກໃນການເປັນຄູ່ຮ່ວມມືທີຍາວໄກ ເພືອຊ່ວຍໃຫ້ ສປປ ລາວ ກ້າວໄປສູ່ ການເປັນລັດທີປົກຄອງດ້ວຍກົດໝາຍຢ່າງແທ້ຈິງ ເນັ້ນການພັດທະນາແບບມີສ່ວນຮ່ວມ ແລະ ຍືນຍົງ.

ໃນຕອນທ້າຍຂອງກອງປະຊຸມ ຍັງໄດ້ມີພິທີເຊັນອະນຸມັດແຜນງານ ບົດລາຍງານຄວາມຄືບໜ້າຂອງປີ 2025 ແຜນຈັດຕັ້ງປະຕິບັດປີ 2026 ແລະ ອະນຸມັດແຜນດໍາເນີນງານຈາກການປັບປຸງ TFD ອີກດ້ວຍ.