ໃນລະຫວ່າງວັນທີ 15-21 ມີຖຸນາ 2026 ຜ່ານມານີ້ ຫ້ອງການຍຸຕິທໍາ ເມືອງ ໄຊຈໍາພອນ ແຂວງ ບໍລິຄໍາໄຊ ໄດ້ລົງເຄື່ອນໄຫວຈັດກິດຈະກໍາໂຄສະນາເຜີຍແຜ່ດໍາລັດ 77/ລບ, ຕັ້ງໂຕະໃຫ້ຄໍາປຶກສາທາງດ້ານກົດໝາຍແບບເຄື່ອນທີໃຫ້ການຈັດຕັ້ງບ້ານ ແລະ ພໍ່ແມ່ປະຊາຊົນບັນດາເຜົ່າໃນ 5 ບ້ານຄື: ບ້ານ ກັ່ວງ, ບ້ານ ຄໍາກູນາ, ບ້ານ ນາແຈງ, ບ້ານ ນໍ້າສັກ ແລະ ບ້ານ ວັງບານ ນໍາພາທີມໂດຍ ທ່ານ ລາຕີ ທິດປະສົງ ຫົວໜ້າຫ້ອງການຍຸຕິທໍາ ພ້ອມດ້ວຍທີມງານ ເຊິ່ງໃນນີ້ມີການຈັດຕັ້ງບ້ານ ແລະ ພໍ່ແມ່ປະຊາຊົນບັນດາເຜົ່າພາຍໃນ 5 ບ້ານເຂົ້າຮ່ວມທັງໝົດ 223ຄົນ, ຍີງ 86ຄົນ.

ຈຸດປະສົງໃນການລົງຈັດກິດຈະກໍາຄັ້ງນີ້ ແມ່ນເພື່ອເຮັດໃຫ້ການຈັດຕັ້ງບ້ານ ແລະ ພໍ່ແມ່ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈແຈ້ງຕໍ່ຈຸດປະສົງ, ເປົ້າໝາຍ, ຂັ້ນຕອນ, ວິທີການຂໍການຊ່ວຍເຫຼືອທາງດ້ານກົດໝາຍ ແລະ ກຸ່ມເປົ້າໝາຍທີ່ຈະໄດ້ຮັບການຊ່ວຍເຫຼືອທາງດ້ານກົດໝາຍໂດຍບໍ່ເສັຍຄ່າ ແນໃສ່ເຮັດໃຫ້ກຸ່ມເປົ້າໝາຍ ແລະ ຜູ້ທີ່ບໍ່ມີຄວາມຮູ້ທາງດ້ານກົດໝາຍສາມາດເຂົ້າເຖິງຂະບວນຍຸຕິທໍາ ຮັບປະກັນການປົກປ້ອງສິດຜົນປະໂຫຍດອັນຊອບທໍາ, ຄວາມສະເໝີຂອງພົນລະເມືອງຕໍ່ໜ້າກົດໝາຍ ເຮັດໃຫ້ສັງຄົມມີຄວາມສະຫງົບ, ຍຸຕິທໍາ ແລະ ສີວິໄລ.