ໃນລະຫວ່າງວັນທີ 22-25 ມິຖຸນາ 2026 ຫ້ອງການຍຸຕິທຳ ເມືອງ ບໍລິຄັນ, ແຂວງ ບໍລິຄຳໄຊ ໄດ້ລົງເຄື່ອນໄຫວໂຄສະນາເຜີຍແຜ່ນິຕິກຳກົດໝາຍ ແລະ ຕັ້ງໂຕະໃຫ້ຄຳປຶກສາທາງດ້ານກົດໝາຍແບບເຄື່ອນທີ່ ຢູ່ບັນດາບ້ານເປົ້າໝາຍ 4 ບ້ານ ຂອງຕາແສງ ນ້ຳເຫືອງ, ເມືອງ ບໍລິຄັນ, ແຂວງ ບໍລິຄຳໄຊ ພາຍໃຕ້ການນຳພາໂດຍ ທ່ານ ພອນຊົງ ເພຍເຊຍຕູກຳມະການພັກເມືອງ ຫົວໜ້າຫ້ອງການຍຸຕິທຳເມືອງ ພ້ອມດ້ວຍຄະນະຮັບຜິດຊອບຂັ້ນເມືອງ, ອຳນາດການປົກຄອງບ້ານ ແລະ ປະຊາຊົນພາຍໃນ 4 ບ້ານເປົ້າເຂົ້າຮ່ວມທັງໝົດ 175 ທ່ານ, ຍິງ 77

   ຈຸດປະສົງຂອງການລົງເຄື່ອນໄຫວໃນຄັ້ງນີ້ ກໍ່ເພື່ອນໍາເອົາເນື້ອໃນຈິດໃຈຂອງນິຕິກົດໝາຍ ທີ່ປະກາດໃຊ້ໃນແຕ່ລະໄລຍະ ແລະ ນຳເອົາດຳລັດເລກທີ່ 77/ລບ ລົງເຜີຍແຜ່ໃຫ້ກັບອຳນາດການປົກຄອງບ້ານ, ພໍ່ແມ່ປະຊາຊົນໄດ້ຮັບຮູ້, ເຂົ້າໃຈ, ເຂົ້າເຖິງຂະບວນການດ້ານກົດໝາຍໄດ້ຫຼາຍຂຶ້ນກວ່າເກົ່າ ແລະ ທັງເປັນການສ້າງສະຕິເຄົາລົບກົດໝາຍ, ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ, ຍົກສູງປະສິດທິພາບໃນການຄຸ້ມຄອງລັດ-ຄຸ້ມຄອງສັງຄົມດ້ວຍລະບຽບກົດໝາຍ ໃຫ້ເຂັ້ມງວດ, ເຮັດໃຫ້ສັງຄົມມີຄວາມສະຫງົບ, ສີວິໄລ ແລະ ຍຸຕິທຳ. ບັນດານິຕິກຳກົດໝາຍທີ່ນຳມາເຜີຍແຜ່ໃນຄັ້ງນີ້ ປະກອບມີ ບາງມາດຕາຂອງປະມວນກົດໝາຍອາຍາ,  ປະມວນກົດໝາຍແພ່ງແລະ  ແລະ  ດຳລັດ ສະບັບເລກທີ່ 77/ລບ, ລົງວັນທີ 28 ກຸມພາ 2018 ວ່າດ້ວຍການຊ່ວຍເຫຼື່ອທາງດ້ານກົດໝາຍ, ແລະ ຕັ້ງໂຕະໃຫ້ຄໍາປຶກສາທາດ້ານກົດໝາຍ. ຜ່ານໄລຍະການດຳເນີນກິດຈະກຳເຫັນວ່າ ບັນດາຜູ້ເຂົ້າຮ່ວມ ໃຫ້ຄວາມສົນໃຈ ແລະ ຍົກບັນຫາຂຶ້ນມາສົນທະນາແລກປ່ຽນບົດຮຽນ, ປະກອບຄໍາຄິດ-ຄໍາເຫັນ ຢ່າງກົງໄປ-ກົງມາເຮັດໃຫ້ມີບັນຍາກາດຟົດຟື້ນ ໃນໂອກາດດຽວກັນນັ້ນ, ຄະນະຮັບຜິດຊອບຂັ້ນເມືອງຍັງໄດ້ແຈກຢາຍ ແລະ ມອບປື້ມກົດໝາຍ, ໂພສເຕີ ນ້ອຍ-ໃຫຍ່ ກ່ຽວກັບການໃຫ້ຄຳປຶກສາດ້ານກົດໝາຍຈໍານວນໜຶ່ງໃຫ້ແກ່ບ້ານອີກດ້ວຍ.

ຕອນທ້າຍ ປະທານກອງປະຊຸມ ໄດ້ມີຄໍາເຫັນບາງບັນຫາທີ່ສຳຄັນ ທ່ານໄດ້ເນັ້ນໜັກໃຫ້ການຈັດຕັ້ງບ້ານ, ພໍ່ແມ່ປະຊາຊົນພາຍໃນບ້ານທີ່ໄດ້ຮັບຟັງການເຜີຍແຜ່ນິຕິກຳກົດໝາຍໃນຄັ້ງນີ້ ຈົ່ງພ້ອມກັນມີສະຕິລະວັງຕົວ, ຕື່ນຕົວ, ກະຕືລືລົ້ນຕໍ່ວຽກງານດ້ານລະບຽບກົດໝາຍໂດຍນຳເອົາເນື້ອໃນຂອງ ນິຕິກຳກົດໝາຍ ທີ່ໄດ້ຮັບຟັງໄປນັ້ນ ໃຫ້ນຳໄປຈັດຕັ້ງປະຕິບັດຜັນຂະຫຍາຍ, ໜູນໃຊ້ເຂົ້າໃນໜ້າທີ່ວຽກງານຕົວຈິງຢ່າງເຂັ້ມງວດ ເຮັດໃຫ້ສັງຄົມມີຄວາມສະຫງົບ, ຍຸຕິທໍາ, ສີວິໄລ ແລະ ກ່າວໄປສູ່ ລັດແຫ່ງ ສປປ ລາວ ທີ່ປົກຄອງດ້ວຍກົດໝາຍເທື່ອລະກ້າວ.

ຂ່າວ-ພາບ : ບຸນຄ້ຳ ເພັດມະນີ