ໃນລະຫວ່າງ ວັນທີ: 09-25 ມິຖຸນາ 2026, ຫ້ອງການຍຸຕິທຳເມືອງມະຫາໄຊ ໄດ້ເຄື່ອນໄຫວໂຄສະນາເຜີຍແຜ່ກົດໝາຍ, ນິຕິກຳ ແລະ ຕັ້ງໂຕະໃຫ້ຄຳປຶກສາທາງດ້ານກົດໝາຍ ແບບເຄື່ອນທີ່

- ນຳພາການເຄື່ອນໄຫວໃນຄັ້ງນີ້ໂດຍ ທ່ານ ຄຳສະຖິດ ພົມມະດີ, ຫົວໜ້າຫ້ອງການຍຸຕິທຳເມືອງ ພ້ອມດ້ວຍພະນັກງານ ບັນດາຫົວໜ້າໜ່ວຍງານ ຂອງຫ້ອງການດັ່ງກ່າວ ແລະ ໃຫ້ກຽດເຂົ້າຮ່ວມຂອງ ຄະນະກຳມະການປົກຄອງຕາແສງປ່າໜາມ ແລະ ຄະນະກຳມະການປົກຄອງຕາແສງໂພນເມືອງ ໄດ້ໃຫ້ກຽດເຂົ້າຮ່ວມໃນຄັ້ງນີ້

ການເຄື່ອນໄຫວວຽກງານດັ່ງກ່າວ ທັງໝົດມີ: 07ບ້ານ ຄື: ບ້ານນາແສ, ບ້ານນາກະທ້າງດົງ, ບ້ານໂພນນາດີ, ບ້ານແຕງ, ບ້ານນາປວກ, ບ້ານໂພນເມືອງ ແລະ ບ້ານນາຜາແກ້ວ.

ມີຜູ້ເຂົ້າຮ່ວມຮັບຟັງທັງໝົດ ຈຳນວນ: 425 ຄົນ, ຍິງ: 142 ຄົນ

ບັນດາກົດໝາຍ ແລະ ນິຕິກຳ ທີ່ນຳໄປເຜີຍແຜ່ໃນຄັ້ງນີ້ມີ:

- ປະມວນກົດໝາຍແພ່ງ ບາງໝວດ,ບາງມາດຕາ ເຊັ່ນ: ຄອບຄົວ, ກຳມະສິດ, ຂໍ້ຜູກພັນໃນສັນຍາ, ຂໍ້ຜູກພັນນອກສັນຍາ ແລະ ມູນມໍລະດົກ;

- ວຽກງານທະບຽນສານ;

- ວຽກງານທະບຽນຄອບຄົວ;

- ພາລະບົດບາດຂອງຫ້ອງການຍຸຕິທຳເມືອງ;

- ດຳລັດ ວ່າດ້ວຍການຊ່ວຍເຫຼືອທາງດ້ານກົດໝາຍ

ຈຸດປະສົງ ຂອງການໂຄສະນາເຜີຍແຜ່ກົດໝາຍ ກໍແມ່ນເພື່ອໃຫ້ ປະຊາຊົນຮັບຮູ້ ແລະ ເຂົ້າໃຈເລິກເຊິ່ງຕໍ່ກັບແນວທາງນະໂຍບາຍຂອງພັກ, ລະບຽບກົດໝາຍຂອງລັັດມີຜົນສັກສິດ ແລະ ການປະກາດໃຊ້ກົດໝາຍແຕ່ລະໄລຍະໃຫ້ທຸກຄົນມີສະຕິເຄົາລົບ ແລະ ປະຕິບັດກົດໝາຍຢ່າງເຂັ້ມງວດ