ພາຍຫຼັງທີ່ມີການອອກ ດໍາລັດເລກທີ 77/ລບ ລັງວັນທີ 28/02/2018 ວ່າດ້ວຍການຊ່ວຍເຫຼືອທາງດ້ານກົດໝາຍ ກະຊວງຍຸຕິທໍາ ຮ່ວມກັບອົງການຈັດຕັ້ງທີ່ກ່ຽວຂ້ອງທັງພາຍໃນ ແລະ ອົງການຈັດຕັ້ງສາກົນໄດ້ຈັດຕັ້ງປະຕິບັດການໃຫ້ບໍລິການຊ່ວຍເຫຼືອທາງດ້ານກົດໝາຍໂດຍບໍ່ຄິດຄ່າ ໃຫ້ແກ່ກຸ່ມເປົ້າໝາຍເຊັ່ນ: ຜູ້ທຸກຍາກ, ຜູ້ດ້ອຍໂອກາດ, ຄົນພິການ, ເດັກທີ່ຕ້ອງການການປົກປ້ອງພິເສດ, ຜູ້ກະທຳຜິດທີ່ກົດໝາຍກຳນົດໃຫ້ມີທະນາຍ ຄວາມເຂົ້າໄປຊ່ວຍເຫຼືອ, ແມ່ຍິງ ແລະ ເດັກນ້ອຍ ທີ່ຖືກເຄາະຮ້າຍຈາກການໃຊ້ຄວາມຮຸນແຮງ, ຜູ້ຖືກເຄາະຮ້າຍຈາກການຄ້າມະນຸດ ໂດຍຜ່ານການຈັດຕັ້ງໃຫ້ການຊ່ວຍເຫຼືອທາງດ້ານກົດໝາຍ; ເຊິ່ງການຊ່ວຍເຫຼືອທາງດ້ານກົດໝາຍນີ້ປະກອບມີ: ການສະໜອງຂໍ້ມູນຂ່າວສານ, ການໃຫ້ຄໍາປຶກສາທາງດ້ານກົດໝາຍ, ການຊ່ວຍເຫຼືອໃນການຮ່າງເອກະສານ, ການເປັນຜູ້ຕ່າງໜ້າໃນການດໍາເນີນຄະດີ ຕາມການຮ້ອງຂໍ້ ຫຼື ສະເໜີ.
ນັບແຕ່ຕົ້ນປີ 2020 ເປັນຕົ້ນມາ, ໄດ້ມີການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (COVID-19) ໃນຂອບເຂດທົ່ວໂລກ ເຮັດໃຫ້ລັດຖະບານແຫ່ງ ສປປ ລາວ ໂດຍສະເພາະ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ (COVID-19) ໄດ້ອອກບັນດາມາດຕະການຕ່າງທີ່ຈໍາເປັນ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດດັ່ງກ່າວ, ເຊິ່ງມັນເຮັດໃຫ້ເກີດມີຜົນກະທົບຕໍ່ການດໍາລົງຊີວິດ ບໍ່ວ່າຈະເປັນທາງດ້ານສັງຄົມ ແລະ ເສດຖະກິດເປັນວົງກວ້າງ.
ຕໍ່ກັບສະພາບການລະບາດຂອງ ພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (COVID-19) ແລະ ການປະຕິບັດບັນດາມາດຕະການ ທີ່ທາງຄະນະສະເພາະກິດອອກມາ, ມັນຈໍາເປັນ ແລະ ຮຽກຮ້ອງໃຫ້ມີການຫັນເປັນທັນສະໃໝ ແລະ ເປັນລະບົບດິຈິຕອນ ໃນບັນດາວຽກງານການບໍລິການປະຊາຊົນຂອງພາກລັດ ໃຫ້ຫຼາຍຂຶ້ນ. ສະນັ້ນໂຄງການສະໜັບສະໜູນແຜນຍຸດທະສາດເພື່ອສ້າງຄວາມເຂັ້ມແຂງໃຫ້ແກ່ລັດ ທີ່ປົກຄອງດ້ວຍກົດໝາຍຢູ່ ສປປ ລາວ ຫຼື ໂຄງການ 3S-RoL ທີ່ໄດ້ຮັບການສະໜັບສະໜູນ ອົງການສະຫະປະຊາຊາດເພື່ອການພັດທະນາ (UNDP) ໄດ້ເຫັນຄວາມສໍາຄັນໃນການເພີ່ມຊ່ອງທາງການເຂົ້າເຖິງການຊ່ວຍເຫຼືອທາງດ້ານກົດໝາຍ ໂດຍສະເພາະຊ່ອງທາງລະບົບດິຈິຕອນ ຈິ່ງໄດ້ສະໜັບສະໜູນ ໂດຍການຮ່ວມມືກັບ ກົມຄຸ້ມຄອງ ແລະ ສົ່ງເສີມວຽກງານຍຸຕິທໍາ, ກົມຮ່ວມມືສາກົນ ຂອງ ກະຊວງຍຸຕິທໍາ ໃນການພັດທະນາ "ການຊ່ວຍເຫຼືອທາງດ້ານກົດໝາຍຜ່ານລະບົບດິຈິຕອນ ຢູ່ ສປປ ລາວ" ນີ້ຂືິ້ນມາ.
ທ່ານສາມາດສົ່ງ ຄໍາຄິດເຫັນຕໍ່ເວັບໄຊ ໂດຍຜ່ານແບບຟອມນີ້.
